Virus un Baktierien Entzindungen
Daut es wichtich dän Unjascheet to weeten tweschen von Virus ooda von Baktierien krank to woaren, woo un wanea Entzindunksmedizien to brucken, wan wie Entzindunksmedizien Faulsch brucken, dann büt daut eenen Jäajenstaunt to Entzindungksmedizien. Waut du kaust doonen wan du krank best.
Baktierien & Virusen
Baktierien & Virusen kjennen beid Entzindungen (Infekzionen) wirkjen, oba Entzindungs-Medizien wirkt blooss jäajen Baktierien.
Entzindungen von Virusen (Infekzionen)
- Hia unja komen Vekjildet, Jrippen, Krup, schlemme Schlucka,
Brustvakjill (Luftrua-Entzindunk) un de mieeschte Haulswedoag. - Vespreden sikj leichta aus baktierische Entzindungen (Infekzionen). Wan miere Persoon en ne Famielje de selwje Krankheit ha, es et warschienlich ne Virus-Entzindung.
- Kaun die krajkt soo krank moaken aus baktierische Entzindungen.
- Woaren jeweenlich benna 4-5 Doag bäta, oba daut kaun so lang aus 3 Wäakj nämen gaunz jesunt to woaren.
- Entzindungs-Medizien halpt nuscht fa Virus-Entzindungen
Baktierische Entzindungen (Infekzionen)
- Sent nich so bekaunt aus Virus-Entzindungen.
- Schlapen nich soo leicht äwa von eene Persoon no de aundre aus
Virus-Entzindungen. - Bekaunde Biespellen sent: schlemma Hauls (strep) un atelje Sorten
Lungen-Entzindungen.
- Entzindungs-Medizien wirkjen jäajen baktierische Entzindungen, sent oba nich emma needich
Jäajenstaunt fa Entzindungs-Medizien
Bruck Entzindungs-Medizien weislich, om Jäajenstaunt fa Entzindungs-Medizien väabieejen.
Henjwauschen
Henjwauschen es de basta Wajch daut Vespreeden von aunsteckende Krankheit väabieejen.
Feeba
Feeba es toone huaje Kjarpa-Temperatur, jeweenlich von Krankheit. Hut waut root, heet un drieech es, sogoa unja de Oarms, tieekjent Feeba aun. Dien ooda dien Kjint siene Temparatur es aun veschiedene Deele vom Kjarpa veschieden.
Feeba:
- Halpt däm Kjarpa Entzindung to bekjampfen
- Kaun von Virus un Baktierien Entzindungen beides komen
Fläajen:
- Feeba halpt dän Kjarpa jäajen Entzindung to kjampfen, Feeba kaun von Virus un Baktierien Entzindung beides komen.
- Veleicht west du paracetamol (acetaminophen) ooda ibuprofen brucken (soo aus doat op doat Dosje sacht), wan däm Pazient onwool es.
- Bruck denne Kjleedie fa die ooda dien Kjint, soo daut die kjeel es oba nich kolt, hubbren moakjt mea Hett. Hool de Temparatur en de Stow so bie 20° C ooda macklich kjeel.
- Drink väl Wota un kjeele Flissichkjeit. Beed dien Kjint väl kjeele Flissichkjeit ooda Poppsickels aun, aule Stund wan daut wacka es.
Wan eene Persoon von irjent een ella Feeba ooda rot Plackich woat, un wua es jewast wua Mausslen sent, dan go no Health Link (deil 811 en Alberta) um Rot to kjrieejen waut aum basten to doonen es.
Vekjildet un Schnoddanäs
Vekjildet woat von Virusen ve-uasoakt. Doa sent unjefäa 200 vaschiedne Virusen de Vekjildet brinjen. Kjinja kjennen von 8-10 mol eem Joa Vekjilln sikj. Groote Persoonen kjriejen weinja, wäajen de haben aul Jäajenstaunt fa atelje Virusen. Entzindungs-Medizien halpt nuscht fa Virus-Entzindungen.
Tieekjens:
- Aum Aunfank Koppweedoag, Feeba, wutaje Üagen un dan Schnudda-Näs, schlemma Hauls, Prusten un Hoosten.
- Flissichkjeit ut de Näs es aunfenklich kloa un woat lota oba jäl ooda jreen.
Väabieejunk:
- Wausch diene Henj om daut Vespreeden von Virusen waut Vekjildet brinjt väatobiejen.
- Lia diene Kjinja sikj de Henj to wauschen.
Fläajen:
- Drinkj väl Wota met soone Temperatur aus daut maklichste es.
- Veleicht west du paracetamol (acetaminophen) ooda ibuprofen brucken (soo aus daut op doat Dosje sajcht) wan dee Persoon sikj nich goot feehlt.
- Wan du die Vekjilt hast ooda wäm met Vekjildet fläachst, dan wausch diene Henj foaken, om daut du daut nich aun aundre wieda schlapts.
- Een Hoost-Zieropp ooda Vekjilungs Medizien (decongestant) kaun de Tieekjens halpen; woat oba de Tiet von Vekjildet nich kjarta moaken.
Woarnunk: Jeff dise Produkten nich Bäbes ooda Kjinja unja 6 Joa.
Woarnunk: Hoost-Zieropp ooda Vekjilungs Medizien haft mettunja Medizien bennen, om Feeba rauf to brinjen. Läs de Zatels väasechtich un froag dän Opptiekja enne Opptiekj ooda dien Dokta, doamet du nich too väl Medizien jeffst.
Bruck Solt-Woota (saline) Näs-Lakjen fa ne dichte Näs, besondasch bie Bäbes un kjliene Kjinja. Bruck Solt-Woota Lakjen ooda een Sprä vom Stua ooda moak dien ieejnet.
Selwstjemoakte Solt-Woota Lakjen
Toop rieren:
- 1 Kuffel (240 mL) reinet Woota (wan du blooss Woota vom Kron bruckst, dan koak daut ieescht eene Minut un lot et aufkjeelen
- ½ Teeläpel (2.5 g) Solt
- ½ Teeläpel (2.5 g) Baksooda
Jeet de Flissichkjeit en eene reine Buddel met een Lakja ooda een Dreppa (beim Medizien-Stua to haben). Moak aule 3 Doag eent freschet.
Aunwanden:
- Sett stell un län dien Kopp no hinjn. Nich dol lajen. Do den Buddel Lakja ooda een Dreppa een kortet Engsje en de Näs nenn. Lakj väasechtich een poa Dreppn enne Näs. Wadahol fa daut aundre Näsloch. Wesch dän Lakja no jieda Mol met een reinet Kodda ooda Papia auf.
De Jrippen (Influensa)
Jrippen (ooda de Flu) woaren von Virusen ve-uasoakt. Groote Persoonen met Jrippen kjennen dän Virus aun aundre äwadroagen von 3-5 Doag no däm daut see Tieekjenz kjrieejen. Kjinja met Jrippen kjennen dän Virus aun aundre äwadroagen bat op 7 Doag.
Tieekjens:
- Feeba/Hubbren
- Kopp-weedoag
- Muskel ooda Kjarpa-weedoag
- Meed feelen
- Schlemma Hauls
- Schnuddaje Näs ooda dichte Näs/Prusten
- Hoost
Väabieejunk:
- Nemm jieda Joa dee Flu Impf.
- Wausch diene Henj, besondasch wan du bie eenen Kranken wieescht. Lia dien Kjint de Henj to wauschen.
- Bedakj dien Mul un Näs beim prusten ooda hoosten.
- Lia dien Kjint ea Mul to bedakjen.
Fläajen:
- Drinkj väl Flissichkjeit soo aus Wota.
- Reiw die üt ooda lot dien Kjint sikj jenuach fereiwen. Bliew Tus un hool dien Kjint Tus fa de ieeschte poa Doag om to fereiwen un om den Virus nich to vespreeden.
- Veleicht west du paracetamol (acetaminophen) ooda ibuprofen brucken (so aus daut op doat Dosje sajcht) fa Feeba, Kooprietinj un Kjarpa-Weedoag.
De Jripp-Tiet fankt jieda Joa jeweenlich en Nowamba ooda Dezamba aun un hieet em Aprell ooda Mei opp. Metunja kaun de Flu to Lungen-Entzindunk fieren.
Sinusitis
De Sinusen sent met Loft aunjefelde Städa rum de Näs un Uagen. Sinusitis passieet wan doa Flissichkjeit opp-but. Sinusitis kjemt mieeschens no Vekjildet, oba doat mieeschte Vekjildet brinjt nich baktierische Sinusitis. De Tieekjens von Sinusitis sent schlemma un holen lenja aun aus Vekjildet.
Tieekjens:
- Weedoag ooda Druck em Jesecht, Kopp-weedoag, Tänen-weedoag, meed feelen, hoosten, Feeba.
- Dichte Näs met jälet ooda jreenet Schnodda waut lenja aus 10 Doag aunhelt kaun een Tieekjen sennen daut die Entzindungs-Medizien fält.
Fläajen:
- Veleicht west du paracetamol (acetaminophen) ooda ibuprofen brucken (so aus daut op doat Dosje sajcht), fa Weedoag un Feeba.
- Fa Kjinja bruck Solt-Wota Lakjen ooda Spretzen om dichte Näs to halpen (kjick unja Vekjilt/Schnoddanäs opp Sied 9 fa een Rezap); fa groote halpt met Solt-Woota speelen mea.
- Medizien soo aus Vekjilungs Medizien (decongestants) kaun dichte Näs halpen oba daut woat de Tiet von Jrippen nich kjarta meaken.
WOARNUNK: Jeff dise Medizien nich Bäbes ooda Kjinja unja 6 Joa.
WOARNUNK: Vekjilungs Medizien haft mettunja Medizien bennen, om Feeba rauf to brinjen. Läs de Zatels väasechtich un froag dän Opptiekja enne Opptiekj ooda dien Dokta, doamet du nich too väl Medizien jeffst.
Baktierien & Virusen kjennen beid Sinusitis wirkjen, (Virusen sent bat 200 Mol so riew).
Schlemma Hauls
Een schlemma Hauls kjemt foaken met Vekjildet. Meist aule schlemma Hauls komen von Virusen. Entzindungs-Medizien halpt nuscht jäajen schlemmen Hauls von Virusen.
Eensje schlemmen Hauls kjemt von Strep (Streptococcus) Baktierien. Wan bie schlemmen Hauls uck ranje Näs, Hoost, heesche Stemm, Schlemme Uagen ooda Derchfaul es, kjemt daut woarschienlich von een Virus un NICH von Strep.
Dien Dokta kaun nich sajen auf dien schlemma Hauls Strep es blooss met däm seenen.
- Wan de schlemma Hauls een Poat von Vekjildet es, dan es daut woarschienlich von een Virus un een Test met een Wauten-Stockje es nich needich.
- Wan du nich Tieekjens von Vekjildet hast, dan woat dien Dokta veleicht een Test met een Wauten-Stockje nämen, om to seenen auf daut von Baktierien ooda von een Virus kjemt. Dee Auntwuat von soon Test es jeweenlich benna 48 Stund reed.
- Wan dee Auntwuat von dien Test negatiew es, woat Entzindungs-Medizien nich halpen jäajen schlemmen Hauls, wiels daut kjemt von een Virus.
- Wan dee Auntwuat von dien Test poositiew es, woat dien Dokta veleich Entzindungs-Medizien gäwen.
- De aundre en de Familje doaft nich jetest, buta de sent krank.
Fläajen:
- Drinkj väl Flissichkjeit soo aus Wota.
- Veleicht west du paracetamol (acetaminophen) ooda ibuprofen brucken (so aus daut op doat Dosje sajcht) fa Hauls-Weedoag un Feeba.
- Fa Kjinja 6 Joa un äla un groote Persoonen kjennen Hauls-Kende halpen fe den Schlemmen Hols.
WOARNUNK: Kjlandre Kjinja sull nich Hauls-Kende jejäft woaren, wiels dua Jefoa es von veschlucken. - Fa ellre Kjinja und groote Persoonen halpt met Solt-Wota gorglen om dän Hauls makelja feelen to moaken. Ria en ½ Teeläpel Solt met 1 Kuffel (250 ml) woamet Woota toop. Gorgel fa 10 Zekunden. Dit doaft von 4-5 Mol dän Dach jedonen.
- Du ooda dien Kjint kjennen wara jeweenlich romschaufen wan jie bäta feelen.
Uarnrietinj
De Eustachian Leidinj fieet vom Meddel-Ua no hinje em Hauls. Wäajen dise Leidinj mau schmaul es en junge Kjinja, kaun dee too gonen, besondasch bie Vekjildet. Wan dise veschleckt dann kaun doat Entzindung gewen.
Daut es wichtich to vestonn, daut 70-80% von soone Entzindung een Kjinja oonen Entzindungs-Medizien wajchjäat. Eensje Uarn-Entzindungen komen von Virusen un aundre von Baktierien. Dien Dokta woat wahrscheinlich glewen doat doat bäta ees enbeschje opmoaksam wachten, en aun seen aus doat selfst bäta woat.
Tieekjens:
- Feeba
- Uarnrietinj
- Vedrisslich
Väabieejunk:
- Wausch diene Henj foaken un lia dien Kjint Henj wauschen, wiels de mieeschte Uarn-Entzindungen komen no Vekjildet.
- Do nich rom Kjinja schmieckjen.
- Jeff dien Kjint nich de Buddel wan doat plaut op dem Rijen licht.
Fläajen:
- Veleicht west du paracetamol (acetaminophen) ooda ibuprofen brucken (so aus daut op doat Dosje sajcht) fa Uarn-Weedoag un Feeba.
- Laj een woamet Kodda opp daut Ua.
- Antihistamines un Vekjilungs Medizien (decongestants) halpt nuscht jäajen Uarietinj.
- Eensjemol woat dien Dokta kjennen Entzindungs-Medizien jewen wan he ieescht dien Kjint daut Ua unjasocht haft.
- Doat woat nich tojeroot Entzindungs-Medizien to brucken fe ne längre tiet fe Uarn-Entzindungen, om doat eena nich den Jäajenstaunt fe Entzindungs-Medizien oppbuet.
Hoost
Meist aule Hoost bie kjlien un groot komen von Virus-Entzindungen bie de Loft-Ruaren (See de Tabelle unje). Entzindungs-Medizien sull blooss dan fa Hoost jebruckt woaren, wan de Kranka Lungen-Entzindunk von Baktierien haft ooda de Test positiew es fa Dolla Hoost (Bleiwe-Hoost).
Väabieejunk:
- Impfen luten fea Dolla Hoost (Bleiwe-Hoost) es secha en halpt om doat fea to biegen doat mon nich schwoa krank woat. Bitte, meak secha doat du and diene Kjinja aule Imfpen jenomen han de väa-jeschleaoen sent, uk dee woat junt fea Dolla Hoost (Bleiwe Hoost) beschuetzen.
Tieekjens:
- Feeba, Hoost, un Brustweedoag
- Jälet ooda jreenet Schnudda ruthoosten. Dit bediet nich daut et ne baktieriesch Entzindung es.
- Doa kaun Rochlen sennen.
- Informazion: Bie Loft-Ruaren Entzindunk von Virus woaren 45% von aule Personen noch 2 Wäakj hoosten. 25% von soone Personen hoosten noch no 3 Wäakj
Krankheit | Städ | Ella Grupp | Uasoak |
Schlucka-Entzindung | Stemm-Benja | Ellre Kjinja un | Virusen |
Krup | Stemm-Benja un Loftruaren | Jinjre Kjinja | Virusen |
Loft-Ruaren Entzindung1 | (Groote) Loft-Ruaren | Ellre Kjinja/Oppjewossene | Virusen |
Kjlienen-Loft-Ruaren | Loft-Ruaren (kjlien) | Bäbes | Virusen |
Lungen-Entzindung | Kjliene Loft-Fuppjes | Aule Ellasch | Baktierien ooda |
Dolla Hoost (Bleiwe-Hoost) | Näs no Lungen | Aule Ellasch | Baktierien |
1 Kranke met langbliewende Lungen-Krankheit kjrieejen metunja baktierische Entzindung wan see Loft-Ruaren Entzindung han.
Fläajen:
- Drinkj väl Flissichkjeit soo aus Wota.
- Hoost-Medizien kaun ellre Kjinja un groote Persoonen halpen.
WOARNUNK: Jeff dise Medizien nich Bäbes ooda Kjinja unja 6 Joa.
WOARNUNK: Hoost-Zieropp kaun eenjemol Medizien benn han, fe Feeba. Läs de Zatels väasechtich un froag dän Opptiekja enne Opptiekj ooda dien Dokta, doamet du nich too väl Medizien jeffst. - Eefache Hoost-Kende kjennen ellra Kjinja un groote Persoonen halpen. Bruck nich antibaktierische Hoost-Kende, wiels de kjenn to Jäajenstaunt fa Entzindungs-Medizien fieren.
WOARNUNK: Hoost-Kende sull nich Kjinja unja 6 Joa jejäft, wiels doa Jefoa es fa veschlucken. - Een Brost X-rä woat jemeakt om nu to seen aus du baktierische Lungen-Entzindung hast. Wan doat wiest doat du bakteriesche Lung-Entzindung hast dann woat die jeweenlich Entzindungs-Medizien jejeft woarn.
Wichtje Zeins waneja num Dokta to foarn
Dise Tieekjens motten vom Dokta ooda ne Nurss unjasocht.
Feeba
- Wan een Kjint unja 3 Moonat Feeba haft, sullen de fuaz unjasocht woarn.
- Wan een Kjint aule ellasch Feeba haft un bütajeweenlich krank es, sullen de fuaz unjasocht woaren.
- Wan een Kjint aule ellasch Feeba haft fa äwa 3 Doag, sullen de benna 24 Stund unjasocht woaren.
Uarnrietinj
Go nom Dokta wan een Kjint Uarnrietinj haft un:
- De uck huach Feeba han; ooda
- De krank sent; ooda
- De hinja de Uarn root sent ooda Schwulz
han; ooda - Daut Ua no vären jeschowen es; ooda
- Äre Uarnrietinj äwa 24 Stund schlemm
blift, sogoa wan paracetamol (acetaminophen)/ibuprofen jejäft woat.
Erwossene met Feeba ooda met aundre Krankheit sullen emma een Dokta ooda ne Nurss seenen wan de Tieekjens schlemma woaren ooda buta jeweenlich schlemm sent.
En Alberta kaust du Health Link (bie 811) aunroopen, wan die Rot fält ooda du nich weetst waut du sust doonn.
Fa praktischen Rot äwa Jesuntheits-Probleemen met Kjinja, go no ahs.ca/heal, Dit es ne Städ wua aulemaun Rot finkt for Stollery Children’s Hospital.
Wichtje Zeins woat Noatfaul sent
Wan du ooda wäm du besorjchst irjent eent von dise Tieekjens haft, go fuatz num Dokta.
Feeba
Fuaz num Dokta foarn, wan:
- Een Kranka von irjent een Ella Feeba haft un sea vedrisslich ooda derch en Quada, (schwoa opp to wajkjen ooda waka to hoolen jeit), emma wada kolkjt, stiewet Gneck ooda fäl rode Placken hiricht waut nich veschwinjen von nopp drekjen (daut kaun no bleiwe Placken loten).
Odmen
Fuaz num Dokta foarn, wan:
- Een Kranka von irjent een Ella schwoa haft met de Loft (nich von ne dichte Näs).
- Een Kranka fäl bosja ooda lanksama aus jeweenlich Loft holt, ooda bleiwe Leppen, Henj ooda Feet bleiw sent.
Äwaraulen Toostaunt
Fuaz num Dokta foarn, wan:
- Een Kranka von irjent een Ella schwoa opp to wajkjen ooda waka to hoolen jeit, ooda mea derch een aunda es, vedrisslicha ooda mea orruich aus jeweenlich, schlemme Kopprietinj de aunhellt, stiewet Gneck, bunte blausse, ooda kolde Hut haft.
- Een Kranka Tieekjens haft von Utdriejen, soont aus drieeje Hut, drieejet Mul, dee wiekje stad on Bäbe ea Kopp en beet nen fählt (fontanelle), ooda sea weinich Wuta loss woat.
Aundre Uasoaken fuaz num Dokta to foarn:
- Wan een Kranka meist nich schlucken kaun ooda sea kjwielt.
- Wan een Kranka von irjent een Ella schlaup es, nich rieren kaun, ooda Aunfaul haft.
Disse informazion es blooss jejëft om to halpen. Du mottst emma diene iejne Kjantness brucken, to weeten auf du met een Dokta ooda ne Nurs räden sust.
En Alberta kaust du Health Link (bie 811) aunroopen, wan die Rot fält ooda du nich weetst waut du just doonn.
Jäajenstaunt fa Entzindungs-Medizien
Waut es Jäajenstaunt fa Entzindungs-Medizien?
- Irjent Jebruck von Entzindungs-Medizien, auf fa rajchte ooda orajchte Uasoak kaun to Jäajenstaunt fa Entzindungs-Medizien bringn. Om daut Opp-Buen von Jäajenstaunt fa Entzindungs-Medizien väa to bieejen, sull dee Entzindungs-Medizien blooss em Nootfaul jebruckt woaren.
- De Jäajenstaunt fa Entzindungs-Medizien es een Wajch woo de Bakterien läwen bliewen un sikj vemieren kjennen, sogoa wan de Medizien uck doa es. Bakterien dee Jäajenstaunt fa Entzindungs-Medizien han woaren eenjemol „Superbugs“ jenant.
- Wan Bakterien ieescht Jäajenstaunt fa Entzindungs-Medizien jekjräajen han, dan halpen dee nü nich mea so aus iesch.
- Entzindungen (Infekzion) waut von soone Bakterien komen de Jäajenstaunt fa Entzindungs-Medizien jekjräajen han, sent schwoa un manchmol onmäajlich to heelen. Dit kaun to lenjre Krankheit fieren un eena kaun sogoa dua aun stoawen.
- Denkt doaraun, de Bakterien, oba nich DU SELWST, haben Jäajenstaunt! Sogoa gaunz jesunde Mensche, dee niemols Entzindungs-Medizien jebruckt han, kjennen von soone Bakterien waut Jäajenstaunt fa Entzindungs-Medizien opp-jebut han, aunjesteckt woarn.
Entzindungs-Medizien woat nich halpen fa Entzindungen (Infekzion) derch Virusen, soone aus Vekjildet, Jrippen un Loft-Ruaren Entzindung (Brustvakjill). Fa dise Krankheiten Entzindungs-Medizien brucken kaun to Jäajenstaunt fieren.
Waut sust du doonen?
- Velot die nich doaropp Entzindungs-Medizien to kjrieen wan du ooda dien Kjint de Jrippen ooda Hoost han. De mieeschte soone Entzindungen (Infekzionen) komen von Virusen un dan woat de Entzindungs-Medizien nuscht halpen.
- Froag dien Dokta auf diene Entzindung von Virusen ooda von Bakterien kjemt, un auf Entzindungs-Medizien halpen wudd.
- Bliew jeduldich, wan du ooda dien Kjint Tieekjenz von Jrippen han, Hoost ooda schlemma Hauls han. De mieeschte Krankheiten von Virusen gonen wajch so von 4-5 Doag, oba eensjemol kaun daut uck bat 3 Wäakj dieren.
- Wan daut Wankedet romjeit-wausch diene Henj ieremol om nich krank to woaren. Wausch diene Henj krakj so aus doat op dee näakjste Sied sajt.
Bruck Entzindungs-Medizien weislich, om den SUPERBUG JÄAJENSTAUNT väabiejen!
Henjwauschen
Henjwauschen es de basta Wajch daut Vespreeden von austeckende Krankheit (Infekzionen) väatobiejen.
80% von de jeweenelje aunsteckende Krankheit woat met Henj äwajedroacht.
Wanea sust du de Henj wauschen:
- Väar ne Moltiet
- Väar, wäarent, un nom Äten moaken
- Väarm Bäbe besorjen
- Nom Budstuw brucken ooda een Kjint doa halpen
- Väar un nom Kjinja Winjle un aundre Frues Sachen wajchslen
- Nom Näs schnuwen ooda een Kjint Näs weschen
- Nom met aundre Menschen toop Sachen hauntieren
- Väar Kontakt Gläsa nenn saten ooda rut nämen
- Väar un nom Kranke besorjen
- Nom Tiere foodren ooda aunschieren ooda utmesten
- Väar un nom Tänen barschten
Woo sust du de Henj wauschen:
- Bruck Seep un Woota, Blooss met Woota wauschen moakt die nich frie von Jerms
- Meak de Henj naut.
- Bruck jeweenelje Seep.
- Rubbel diene Henj toop fa opp weinichstens 20 Zekunden (ooda so lang aus daut nemmt een Twinkle, Twinkle, Little Star to sinjen). Rubbel aula Deelen von diene Henj, uck tweschen de Finjasch, Hauntjelenk, gaunz bat de Spetz Finjasch un de Finjanäal.
- Speel diene Henj fa 10 Zekunden.
- Drieej diene Henj jrintlich met een reinet Haunduak.
Waut sust du doonen:
- Räakjen opp de Doktasch, Nurssen, un Trajchmoakasch woaren sikj de Henj wauschen ea see die ooda dien Kjint unjasieekjen.
- Moak secha daut doa jeweenelje Seep bie de Wauschkom bie de School fa dien Kjint ooda dien Oabeitsplauz es.
- Moak secha daut doa wua du dien Kjint latzt eene Städ es wua groote un kjliene kjen sick Henj wauschen.
- Bruck jeweenelje Seep. Jeweenelje Seep halpt krajkt so goot aus antibaktierische. Antibaktierische Seep woat nich to jerot, wäajen daut brinjt antibaktierischen Jäajenstaunt.
- Sie en goodet Biespell.
Frie-Spräjkjunk:
Dit Materiol es blooss fa auljemeenen Informazion häajestalt. Alberta Health Services haft fasocht aules rajcht to sajen, oba moaken kjeen Garantie ooda soowaut, daut aules hoajeneiw fa aule Omstenden woat soo un rajcht sennen. Dit Materiol es nich enne Städ dän Rot von eenen utjelieeden Jesuntheits-Professer ooda een Alberta Health Services sprajkt sikj gaunz kloa frie un looss von irjent un aule Ve-auntwuatunk fa irjent Schoden von dän Jebruck von dit Materiol.
Do Bugs Need Drugs,
Communicable Disease Control,
Alberta Health Services.
DBND@ahs.ca
www.dobugsneeddrugs.org
© 2022 Alberta Health Services,
Provincial Population & Public Health
Dit Woakj es veleissent unja: Creative Commons Attribution-Non-commercial-Share Alike 4.0 International license. Um eene Kopie von dise Leissenz to seenen, kjick unja: https://creativecommons.org/licenses/by-nc-sa/4.0/. Du best frie dit to kopieren, ut-todeelen un auntopaussen fa perseenlichen Jebruck, so lang du aunjefst, daut et von Alberta Health Services kjemt, un du die aun aule Bidinjunge von Leissenz helst. Em Faul du dit ve-endaschst ooda doaropp bust doafst du daut bloos unja de selwsje, eene änliche ooda soone Leissenz doone. De Leissenz es nich fa AHS Jeschafts-Marken, Logos usw. wuafäa Alberta Health Services nich daut Rajcht haben.
